کراچی: لیاری، نارتھ کراچی اور قائد آباد میں نوجوان لڑکی سمیت 3 افراد کی گھروں سے گلے میں پھندا لگی لاشیں برآمد ہوئی ہیں۔
تفصیلات کے مطابق کلری کے علاقے لیاری دریا آباد گلی نمبر 8 میں واقع گھر سے ایک شخص کی گلے میں پھندا لگی لاش ملی جسے ضابطے کی کارروائی کے لیے ایدھی کے رضا کاروں نے سول اسپتال پہنچایا۔
ریسکیو حکام کے مطابق متوفی کی شناخت 35 سالہ بابو کے نام سے کی گئی جبکہ پولیس کا کہنا ہے کہ ابتدائی تحقیقات میں واقعہ گلے میں رسی کا پھندا لگا کر خودکشی کا بتایا گیا ہے جبکہ متوفی گھریلو پریشانیوں کا شکار بھی بتایا جاتا ہے۔
علاوہ ازیں نارتھ کراچی سیکٹر 3 عمر گوٹھ میں گھر نوجوان کی گلے میں پھندا لگی لاش ملی جسے ضابطے کی کارروائی کے لیے عباسی شہید اسپتال لیجایا گیا جہاں متوفی کی شناخت 17 سالہ محسن کے نام سے کی گئی۔
قائد آباد ماروی گوٹھ الہدیٰ مسجد کے قریب گھر سے پراسرار طور پر گلے میں پھندا لگی نوجوان لڑکی کی لاش ملی جسے جناح اسپتال لیجایا گیا جہاں ڈاکٹروں نے بھی معائنے کے بعد اس کی موت کی تصدیق کر دی۔
ریسکیو حکام کے مطابق متوفیہ کی شناخت 16 سالہ وجیہہ کے نام سے کی گئی اس حوالے سے ایس ایچ او شاہ لطیف وکیل احمد نے بتایا کہ پولیس جب اسپتال پہنچی تو لڑکی کے ورثا اس کی لاش لیجا چکے تھے۔
