مسجد نبوی کی 67 ہزار مربع میٹر چھت پر نمازیوں کے لیے 5 ہزار بڑے بڑے قالین بچھائے گئے ہیں، فوٹو: فائل
ریاض: رواں برس رمضان المبارک میں مسجد نبوی کی 67 ہزار مربع میٹر چھت پر روزانہ 90 ہزار عبادت گزار نماز ادا کرنے کی سعادت حاصل کر رہے ہیں۔
سعودی میڈیا کے مطابق عاشقان رسول کی مہمان نوازی اور زیادہ سے زیادہ سہولیات کی فراہمی کے لیے مسجد نبوی کی چھت میں توسیع کی گئی تھی تاکہ زیادہ سے زیادہ نمازی جمع ہوسکیں۔
روزانہ کی بنیاد پر صحن کے علاقہ مغرب کی اذان اور افطار کے بعد مسجد نبوی کی چھت کی صفائی کی جاتی ہے اور عشاءاور تراویح کی نمازوں کا اہتما کیا جاتا ہے۔
چھت پر جانے کے لیے مسجد نبوی کے داخلی راستوں کے ساتھ ہی 24 سیڑھیاں بنائی گئی ہیں جب کہ عمر رسیدہ اور ضعیف افراد کے لیے 6 ایسکلیٹرز بھی نصب ہیں۔ نمازیوں کے لیے مسجد نبوی کی چھت پر 5 ہزار قالین بچھائی گئی ہیں۔
علاوہ ازیں بڑی تعداد میں رضاکار معتمرین اور عبادت گزاروں کی رہنمائی اور خدمت کے لیے موجود ہیں جو چھت کی صفائی، افطار کی تیاری اور تقسیم اور زائرین کو ہر ممکن مدد فراہم کر رہے ہیں۔
خیال رہے کہ رواں برس دنیا بھر سے مسلمانوں کی ریکارڈ تعداد عمرے کی سعادت حاصل کرنے اور رمضان کی بابرکت ساعتوں سے مستفید ہونے مکہ و مدینہ پہنچ رہی ہے۔
