چنڈی گڑھ میئر الیکشن کا نتیجہ گزشتہ روز سامنے آیا تھا اور جس متنازعہ طریقے سے بی جے پی امیدوار کو کامیابی ملی، اس نے سبھی کو حیران کر کے رکھ دیا ہے۔ عام آدمی پارٹی (عآپ) اور کانگریس کونسلر تو ریزلٹ سامنے آنے کے بعد دھرنے پر بیٹھ گئے تھے اور پریزائڈنگ افسر کے خلاف آوازیں اٹھا رہے تھے۔ اس معاملے پر پنجاب و ہریانہ ہائی کورٹ میں عرضی بھی داخل کر دی گئی تھی جس پر آج سماعت ہوئی۔ ہائی کورٹ نے عرضی دہندہ کو فی الحال کسی بھی فوری راحت دینے سے انکار کر دیا ہے، لیکن سبھی فریقین سے 3 ہفتہ میں پورے معاملے پر جواب ضرور طلب کیا گیا ہے۔